Nanovokovoka mafy izahay nanomana ny fifidianana filohampirenena
tokony natao tamin’ny faha- 24 jolay lasa teo. Natontona tao avokoa ny ampahan-karama nangonina
aman-taonany, ny tahiry rehetra teo
ampelan-tànana. Kinanjo tsy noraiketin’ny fanjakana ilay daty !
Fesona mihitsy
aho nanomboka teo. Nihivingivina. Nisavorovoro saina hoe sao hahadangy ity
fifidianana toa sangy ratsy pôlitika ity ! Sao tokony sintonina ny maha-kandidà
dia tsoahina ny antoka napetraka, dieny nanova lisitra ny CES2 ? Aleo
avadika fameloman-tena, ampiasaina ny vola fa ity raharahan’angatra ity toa
sarin’ady voatokana ho an’ny saribakolim-bazaha.
Raha
filàn-karena ranofotsiny sy fampitomboam-bola sesilany no fisainana nitondrako
ny fiainako hatramizay dia nalàko tokoa ilay antoka 50 tapitrisa ariary. Ny
ilàna ampiasàna izany rahateo misy dia misy. Raha laza motramotraka sy
fisekosekoana fotsiny no notadiavina, efa ampy izay fisehoana vahoaka izay.
Saingy tsy izany velively. Sady tsy laza amam-boninahitra, na fitadiavan-tseza,
na fitetehana harena manokana no mahatonga ahy mirotsaka ho filohampirenena.
Tsy ho ahy
ambatako, na ho an’ny havako akaiky no
irotsahako amin’ito adidy masina handray an-tànana ny fitondràm-pirenena ito.
Voady efa nataoko tamin’ny tenako hatry ny fahazazako io. Mpangataka teny
an-dàlambe aho faha-zaza, zanak’olona bokan-trosa izay voatery namono tena no
niafarany. Fitiavana avy tamin’olona samihafa no mahatoa izao ahy ankehitriny,
nafahako nianatra sy nitombo fanahy ho vato asondrotry ny tany.
Mianady
Kely manana adidy aho. Omby mahia tokoa saingy
andrandrain’ny kaozatra noho izaho mba hiaro sy hitsimbina azy ireo. Maharary
ahy ny mahita kamboty, mananontena, sembana sy beantitra mangataka eny
an-tsena. Indrindra eny antokontanin’ireny supermarché
ireny. Angarihan’ny vazaha sy ny rajakom-bazaha fotsiny. Maharary ahy
izany ! Ny efa nangataka tamoron-dàlana toa ahy tamin’ny fahazazako no
hany mahatsapa anaty hoe mahakely aina anie io mangataka andalàmbe io, rey
olona ê. Fa akory atao !?
Koa ankasitrahako
etoana ny valintenin’ny vady andefimandriko raha nanontany azy aho nony
niahotra hanohy hifandrirotra amin’izao
fifidianana filohampirenena izao. Hoy Holi Vahömbey Ramiarintsoa tamiko:
« Efa niomananao nandritra ny fiainanao manontolo
ny hitsimbina ny osa, ny hanatsara ny toe-piainan’ny malagasy, ny hanandratra
an’i Madagasikara. Koa satria ve tsy manambola anohizana intsony ianao dia hiala an-daharana, hidina
ampandehanana ? Nefa anie dia io fitiavanao ny olona mihoatra ny tenanao
io mihitsy no mampiraiki-pitia ahy aminao ê. Tadidio izany ! »
Miroso amin’ny
lalina kokoa hatrany aho ankehitriny. Eny na dia efa miharihary aza fa
faran’izay fifidianana kitoatoa ity ho atao fotoam-pahavaratra ity ! Ê
ireto kandidam-panjakana zavontany ! Samy mangalatra dépâra. Samy
mandraviravy vola etsy sy eroa. Vola avy aiza ireny ? Mba vola madio
ve ? Sa vola nahodinkodina, izany hoe vola nangalarina tamin’ny
sarambabem-bahoaka ihany no ampilendalendàna sy andrebirebena azy indray avy eo ?
Na mahafantatra tsiambaratelon-kolikoly goavana aza ny Bianco dia tsy mahefa n’inon’inona manoloana ny andrezatrin'ny fahavalom-pirenena mirotsaka ho kandidà. Ny Samifin moa vava takiky fotsiny. Tsy misy lalàna afahan-dry zareo
misavasava hono. Ary indrindra indrindra manasazy. Ny fitsarana eto amintsika moa
ankehitriny, naman’ny tsy misy. Anarany fotsiny no Fitsaràna !
Amporisihana
izahay kandidà hanao sonia fifanekena izatsy sy izaroa. Ny tenako izao anie ka
nosavasavaina hatraty amin’ny fokontany onenako mihitsy ny mikasika ahy sy ny
toe-piainako ary ny fahaizako miara-monina ê. Tsy nahita nokihanina ny
mpanadihady ! Ireo kandidà rehetra ireo koa ve natao toa izany ?
Miharihary fa rehefa kandidà vaventy dia tsy azo tsikafonina ny mikasika azy. Atahorana,
hono. Sao mamono ? Ary ry zareo rehetra ireo dia kandidà vaventy avokoa. Tombatombany ê.
Alaivo ambony, alaivo ambany. Adihodiho dia halaky hahita ny afenin-dry zareo
ianareo.
Izaho Vahömbey
kosa dia tsy manan-kafenina na inona, na inona. Na fananana ampelan-tànana, na
fidirambola. Ary efa nataoko mazava tany amin’ny antontan-taratasy firotsahako
izany. Izao indray asaina hanao sonia mikasika ny zo sy adidy izahay, mba hanara-dalàna,
hitandro fifanajàna. Koa tokony hiaiky dieny izao tsy hanakorontana
n’inon’inona mandritra ny fifidianana sy aorian’ny valim-pifidianana. Fa izahay
kandidà madinika itony moa izany dia tena heverina ho bado sa gaigy ?
Efa hitam-poko, hitam-pirenena
izao ny fanararaotam-pahefana efa hatry ny taona maro, ny fanaovana didiko fe
lehibe, ny fandrahonana isan-karazany any andakira rehetra any, ny kolikoly atao amin’ny manam-pahefana
isan-sokajiny, sns. Ireo kandidà maventy rehetra ireo efa manao izany avokoa. Ny
sasany aza efa aman-taonany. Dia asaina hanao sonia izahay kandidà madinika mba
hamato-tena hangina n’inon’inona fandikan-dalàna ataon’ny maventy ? Fa
angà izahay raha madinika dia kanosa ka na ho itsahana an-tampondoha aza dia hiforitra ? Sarobidy ho ahy kandidà madinika izany teny omena
anaovan-tsonia izany. Matoa atao misy antony. Raha tsy izay, aleo tsy atao.
Olompirenena
Matoa aho
mirotsaka kandidà, na faran’izay osa tsy manam-bola ho laniana anaratoana
vatom-pifidianana aza, dia mahasahy. Amafisiko amin’ izao firotsahako izao ny fanoherako ny gaboraraka. Na felan-tànampoana aza ny ahy. Izaho sahy
mandroso hamoha ny vavahadin’ny fahamarinana. Na ho vidiako amin’ny aiko aza
izany. Te-ahita ny fireneko miaina anatin’ny rariny sy ny hitsiny aho. Ny
hazavana maharesy aizina no mampivoatra malaky ny be sy ny maro tsy ankanavaka.
Io ny hazavana, io andolohako io.
Olompirenena
faran’izay sarotiny amin’ny fananana iombonana aho. Na tany io, na harena
ambonin’ny tany, na ankibon’ny tany, na andranomamy, na andranomasina, na
an’abakabaka. Tsy antsika ireo fa nampindramina antsika. Tokony kolokoloina,
kajiana sy ampitomboina ho an’ny taranaka fara-mandimby. Leo ny mimenomenona
tsy ankandray andraikitra mivantana aho. Tofoka ny mihanahana fotsiny toa ny
ankamaroan’ny mpikambana ao amin’ny fiarahamonimpirenena.
Nanahy aho sao
fitapitahan’ny mpanodinkodin-dalàna raha ndeha hirotsaka ho fidiana amin’ny
maha-olompirenena tsotra. Kaodikaody aho nikasika ny fampiharan’ny mpitsara ny code électoral. Hany ka naleoko nanangana
an’i FAnambinana MAdagasikara – FAMà ho antoko pôlitika nandrotsaka ahy. Raha
ny sitrapoko dia tsy nitafy pôlitika aho. Tsy mba mpiady seza izany aho
hatramin’izay niainako. Ary tsy ho mpiady seza mandrakizay. Raha seza no
nilaiko efa nahazo hatry ny ela aho. Na dia tamin’ny 2002 fotsiny aza.
Masao mpanao trano
Koa akory ny
hatairako noho ireo namana nantenaiko hanome tànana, raha vao nahare hoe
ifanotofan’ny masao (1) tanteraka ny
lakan’ny kandidà, … Avy hatrany dia namporisika ahy handefitra hanao
sarintsarin-kandidà fotsiny. Efa vita ady varotrin’ny samy masao, hono, ny
fanjakana eto Madagasikara koa aleo aho mipirina. Sady izaho rahateo tsy masao
akory. Kepoka aho.
Ny ampahana
masao mpiherongerona indrindra ao anaty fivondronamben’ny masao no
misetrasetra izay tsizy eto amintsika ankehitriny. Ireo mpanao bodongerona ny
fananam-pirenentsika ireo no mifampitantana amin’i Renikelimalala (2).
Ary ity ankalazaina ho vondrona iraisampirenena ity dia sary vongana raha ny
tena marina.
Sinémà ifanaovan’ny vazaha sy ny rajakom-bazaha, vazaha mody miady,
no mibahana eto Madagasikara. Ny kandidà mpivarotra tanindrazana rahateo moa
raofina amin’ny sobika aminay kandidà miisa 33 ireo ! Sady ireo rahateo
faran’izay mahay mivarotra saka beloha. Jereo moa ity famiravirana ny
maha-isika antsika ity ê ! (3)
Ny olona no harena
Hanavotra ny
tanindrazako no laharam-pahamehako ankehitriny. Noho izany, tsy avelako ataon’iza
na iza antoka ny tanindrazako. Manan-jina ny harena rehetra eto Madagasikara
satria Manankasitsara i Madagasikara, hoy ingahy Olombelo Ricky izay. Io
andrarezin’ny kolontsaina malagasy io rahateo no efa nanafatrafatra hatrany
mikasika ny maha-saropady ny “ kadasitr’i
Madagasikara ”.
Noho izany, tompokolahy
sy tompokovavy, amin’ny maha-taranaka mpanazary vazimba ahy dia aleoko izaho no
kandidà osa indrindra, tsy mba manam-bola, aminay kandidà 33 ireo. Aleoko aho boribory toa izay ampitrosain'ny mpambotry ny tanindrazako, mpanandevo ny fireneko. Na ho tambazana deal toa inona aza !
Amin’ny vahoaka malagasy irery ihany aho no manao velirano hifanasoa sy hifanatsara. Lozan’izay mivadi-belirano.
Ambonin’ito tany diavintsika ito aho no mianiana hitandrina ny rariny.
Ambanin’io lanitra lolohavintsika io aho no manome toky hitandro ny hitsiny.
Mason’andro niany, mivoady aho ny hanao hatrany izay maha-salanitra ny
ambanilanitra.
Koa raha misy
azonareo atao hanafainganana izany, rey havako, dia ataovy ankafaliana re. Na olona iray,
na folo, na zato, na arivo, na halina, na hetsy, na tapitrisa voasarikareo ho
namantsika dia raisintsika an-tànan-droa avokoa.
Tsihy be lambanana ny ambanilanitra. Lapabe tia maro ny tanin-taranaka. Koa ndeha hanao tohivakana, hifanome tànana.
Ny olona no
harena, tompokolahy sy tompokovavy.
(*) « Ny vato izay nolavin’ny mpanao trano no efa
tonga fehizoro indrindra », Salamo 118.22
(1) Franc-Maçon
(2) Françafrique
Aucun commentaire:
Enregistrer un commentaire