Tane'ay toe, rey anö, malay mpangalatse ey !!!

Nipole tama’ay, antanà’ay tanë raho. Nipay troke an-tane. Nisoloha tioke an-danitse. Nifankatreha tami’kàva’e. Nitohake talilin-draza'e, nanontane vaovao: akore ty vilon'tikanë ao, rey agnombe ey, aze vosy bey valo hay iy, mbe soa avao ihy ao ?

Nao, rey anö ! Vata’e !! Moromomorotse vata’e raho baka agne nanike zao. Robake ty filongoa, trobo ty raketse ankazomanga, rokake ze olo vanta’e, gege ty pamarake tratse’ty jamala inoma toake kasetë, matemati’e ty radio karity, mangalatse në agnomben-draza ivilia basy maviriky bala sinky coups, amonoa’ndate ilàn-drala andese ikarioke avao, mihisa meso lava etoa, mampiola lolo eroa !

Marare tratse’ey ty politiky rate atao’e ty fanjakà mpangalatse toe ey : presidà tetezamita, ministry, bey ty rezio, disitrika, kominy, CT, CST, zandary, pôlisy, militera, mpitsara an-tiribonale ! Rate iabe reo iabiabe ey !! Mieritseritse ty ambata’e ho andriamanitse avao aze ondate mandroba-draterate avao ty asa’e. Ni’tetoe zae ! Ni’tetoe fomba rate’ty fanjakà’e malaso, dahalo, fahavalo toe ey.

Ke misïra iabe aze ondate mpangalatse ami’tane toe ey ! Naho kele rehe, naho bey, naho bibe bey, naho bey vata bibe bey ho inö oy. Misïra agne naho rate ey !!

Lignisa’areo malasom-panjakà an-drova agne avao rahay fe hanganike ami’areo agne rahay ke lignisa avao, rey anö ! Aly ro andesi’ay ami’areo malaso-dahalo-fahavalo mpamerivere ty kabeso’ay. Naho movansy inö andese'areo, naho movansy inô ty anara’areo,... Zae avao, hoe rahay. Tampitse ty hagege'areo. Tampitse ey !

Misïra tse Ravalomanana, mose madamo areo roe, heji’ay mavovava mavàka aly, vondrake malay mokotse, ty aze avao ro fanta'e  ! 

Misïra tse Rajoelina, pamarake mavande bibe tale bey ty dahalo avao, naho robake iabe tane toe, Andry ihy avao ro anto'e, Nirina ihy avao ro foto'e ! 

Misïra tse Ratsiraka, lignisa ho bey mitoboke an-kile, enteo ihy milalilaly an-tane, mialy abobo mampanahira ajà ! 

Misïra iabe iareo mpanongàm-panjakà boaka tami’2009 iabiabe reo ! 

Misïra iabe iareo nivalike tami’tane toe, nivarotse ananàn-dràza nipaia’areo drala anaova areo ty piropagandy areo amerivereha ondate an-tonda agne avao. 

Misïra lavitse agne tsy ho matemate fahatane ey !

Vahömbey. Zoke ami’tanë itirian-draiketa ama’taritarike, satromena ty aze mitolike an-danitse.

Vahömbey mitreha: "Atoe ey ! Atoe ey ty lala’e !! Antrokë atoe ey ty lilin-draza’e !!!"