1. Mitsofa rano fa aza manozona !
Manomboka
hasavilivilin’ny rambon’ny « Maneno fitatra » (1) isika izao eto Madagasikara. Tsy atao mahagaga ny
fianahan’ny faharatsiana sy ny habibiana ary ny fanararaotam-paty. Aleo
handripadripaka avokoa ireo sahy ratsy hisedra ny tsiny aman-todin'ny tany aman-danitra
mahaboka forehitra !
Azy ireo izao ny laka. Mahasoava azy ireo izay ataony
rehetra. Tsofy rano amin’ny fo madio izy ireo, ahavanonan’ny tody aminy tsirairay
avy. Aza mandratsy saina manozona azy ireo sao sanatria ny tena indray no manota. Izay vao ho sahiranan'ny bingom-po eo. Aleo azy ireo ny azy !
Lalàn’ny tany aman-danitra izao mihatra izao. Manivana
ny tany, mikororoka ny voaàry, tompokolahy sy tompokovavy. Izay akotry ihany no vanon-ko vary mahabotrabotra sy
ho ambioka fanasin’ny tanin-taranaka. Izay akofa kosa ho pahon-tadio hiraparàpa any
an-tanim-pandozàna fahalovan’ny tsiny.
2. Aza mamaly ratsy ny
ratsy !
Maha-tandrèma tena ! Fadio ny fihetsika mandratra,
fehezo ny vava tsy ambina, foany ny eritreritra vilana. Tandrovy ny hitsiny,
hajao ny marina. Ny olo-mendrika tsy fola-mandefitra. “Maneno fitatra” isika
izao. Tokony hitandrina no dikan'izany, tompoko ô, raha mbola te-ho vanona ihany !
Koa raha ilaina, ianaro Ramasabomanga ! Manaova ombay
làlana eny an-dalàmbe ka hatreny an-tsena. Dingano ny singambolo mpandavo ny vositra, ahilio ny patsa
iray tsy omby vava. Raha malina ê ?! Mifehy hazo tokana.
Mihainoa ilay Mpananatra mpibitsika am-pon’ny mahalala.
Mahasahia mandeha tokana ho sahalain’Andriamanitra. Idiviro ny rebikondrin’ny
ondrafana. Indrindra ny an’ireo jamba mpanara-dia jamba mpampikorotsaka
an-kady.
3. Sao badenina ê !
Sao badenina ê ! Koa ho sodoka indray amin’ny
langolangon’ireo efa namoa-fady nandraraka
an-tany ny ilo mby teny antampon-dohany. Ny andon’ny lanitra tsy indroa hirotsaka
amin’ireo efa nahavanon-doza aman'antambo, nanota voady masina filolohavàm-pirenena ! Na hibebaka in-jato aman’arivo
aza !!
Sao badenina ê ! Koa hiantsampy amin’ny hazo
mampidanandranandrana, hitelina voankazo voarara mampiola-tsinay. Sao sanatria hihinana ambolony koa kenda vao domy aho, rahavana. Mahaiza mamantatra izay
mpaminany sandoka ! Ny an’ny tena vita ihany fa ny taranaka no ho fadiranovana
!!
Sao badenina ê ! Koa alaivo ambony, alaivo ambany. Tilio,
tsikafony, savasavao ny ambahandain’ireo rehetra be filaza ho
mpanavotra tanindrazana.
Na ireo mpangala-tety, mpambotry kamboty, mpitàvana
harem-pirenena nandritra ny taona maro nifandimby !
Na ireo mitonona ho olom-baovao sy misora-tena toa voatango. Aza misy singanina na iza, na iza. Hatramin’ny tompon’izao
lahatsoratra izao.
4. Antampon’i “Samy reraka”
ve ?!
Izao no hafatra ampitaina koa ifampilazalazao. Afaka roa
volana any ho any no hitsirika eto Madagasikara ny “Mangoambodilanitra atsinanana”.
Mialoha ny faran’ity taona diavintsika ity, hivelatra ny « Mazava atsinanana ». Raha
vao mitsidika io taon-ko avy io dia hipàka ny "Vaky masoandro".
« Hifoha
Olona » eto Madagasikara, tompokolahy sy tompokovavy.
Ireo mahavàtra mitandrina ka maha-fehy tena no ho velon'aina amam-panahy, ho velon-dririaria hihanoka ny Hazavana hitsidika dieny “Mangoambodilanitra atsinanana”.
Mahereza, tompokolahy sy tompokovavy ! Tapa-taona sisa, raha ela, no hihafiana izao hagaigen'ny lany fanahy, jiolahim-boto sy jiolahim-bavy, mpiliba ambony jàlim-bahoaka izao !!
Koa araraoty ê ! Araraoty ny fotoan-tsarotra
toa izao hanaovan-tsoa.
Ny soa atao ? Levenam-bola, tompokolahy sy
tompokovavy.
Antsirabe, 02 jolay
2012
RABEARISON Roland
Dieu Donné Vahömbey.
(1)
Ny antsoina hoe « Maneno fitatra »
dia toro fotoana malagasy, mandritra ilay aizin-kitroka firotsaham-panala rehefa ririnina
toa izao. Fotoana filibàn’ny mpamosavy faramparany io, fotoana fandrapahany ny
herivaika fonosin’ny aizina. Mandrovi-tsihy
araka izay tratrany izy eo.
Fem-potoana ankatoky ny
« Mangoambodilanitra atsinanana » no antsoina hoe « Maneno fitatra ».
Aucun commentaire:
Enregistrer un commentaire