4

4

EFATRA. Laharana faha-Efatra isika ao amin’ny bulletin unique sy eny amin’ny peta-drindrim-panjakana mandritry ny fifidianana Filohan’ny Repoblika faha-Efatra.

EFATRA. Efa-joro miorina amin’ny vazan-tany Efatra eto Madagasikara Manankasintsara.

RAIAMANDRENY

Mpiangona tsotra, mpandray Fanasan’ny Tompo ao amin’ny Fiangonana Loterana Malagasy Antsirabe Antampontanàna ny tenako. Mpanamafy orina lalandava an’i Kristy ao am-po sy saina ary fanahy amam-batana. Ao anatintsika tsirairay avy no tempoly tsara indrindra fonenan’Andriamanitra Ray Mpahary tongotra aman-tànana.

Isan’ireo raiamandreny Malagasy ny tenako. 54 taona. Efa mipi-bolo sy sola an-tampondoha. Efa loa-jafy ihany koa. 

Tompokolahy sy tompokovavy, zavatra roa loha no ambarako ampahabemaso mason’andro androany.

1. FIANIANANA

Ny tenako no fidian’ny olompirenena Malagasy, fantenan’Andriamanitra mpandahatra ny zava-drehetra ho Filohan’ny Repoblika faha-Efatra ?

Takiako ampidirina ao amin’ny lahateny fianianako :

« Madio ny tànako mandray izao adidy masina izao. Hadio tanteraka ny tànako hahavita izao adidy masina izao. Miozona amin’ny taranako fara-mandimbiko aho. Tanterahako ankitsim-po izao fianianako izao. »

Soritako mazava : mandat iray ihany no iantsorohako fahefàm-panjakana. Tenin-dehilahy ny ahy. Ary fifidianana faran’izay raitra no ho karakaraintsika ho an’izay handimby toerana. Koa ifampitàna amin’ny fomba faran’izay mendrika ny fifamindram-pahefana. Ho antsika ambanilanitra, izay no teny omeko.

2. ANKEHITRIO

Ho an’ny ankehitrio dia ambarako ren-tany, ren-danitra, izao manaraka izao. 

Mahakasika anay kandidà rehetra miandahy sy miambavy izay mihambo ho kiadin’i Madagasikara Manankasintsara :

« Miantso ny TSININ’ny TANY sy ny TODIN’ny LANITRA hipàka aminay rehetra avy hatrany aho mason’andro niany.

Ny soa rehetra izay nataonay sy ataonay, mivaly aminay antapitrisa ! 

Ny ratsy rehetra izay nataonay sy ataonay, mitampody aminay antapitrisa !!

Mihatra aminay sy ny taranakay tsirairay avy izany !

Izao dieny izao !! »

Ny Malagasy, tompoko, Manankasy. 

Ary Madagasikara, Manankasintsara. 

Mby ny fotoana iavahan’ny vary amin’ny tsiparifary.

Manivana ny tany ! Mikororoka ny voaàry !!

TANIN-TARANAKA: "Ny faravodilanitra no valam-parihiko."

Rohy : http://dwizer.com/election_presidentielle_madagascar/vahombey/

Taratasy misokatra ho fanta-poko, fanta-pirenena.

                                   
 Antsirabe, 03 mey 2013


            
Ho an’Andriamatoa sy Ramatoa

Mpikambana Cour Electorale Spéciale

Antananarivo MADAGASIKARA

Antony : Taratasy misokatra ho fanta-poko, fanta-pirenena.

Manaja, tompoko.

Manoratra izao ny tenako manao sonia etsy ambany taorian’ny fivoahan’ny Décision n°01-CES/D du 3 mai 2013.

Voalohany, maneho fankasitrahana ny fankatoavanareo ny firotsahako fidiana Filohan’ny Repoblika faha-efatra taorian'ny fanadihadiana notontosainareo mikasika izany.

Faharoa, manome toky izahay, ny tenako manokana sy ny komity mpikarakara ny firotsahako fidiana ary ny mpikambana ao amin’ny antoko FAnambinana MAdagasikara – FAMà, fa hanome hasina io fifidianana voalaza etsy ambony io. Noho izany, hitandrina fahamendrehana hatrany na amin’ny fiteny na ny fihetsika. Koa hijoro ho ohatra velona mpandàla lalàna sy fahaiza-miaina anivon'ny tany ama-monina.

Fahatelo, manambara ho ren-tany, ren-danitra ny fankatoavanay izay voarakitra ao amin’ny Décision n°01-CES/D du 3 mai 2013. Noho izany, ialanay lavitra izay siasia ara-pôlitika sy filan-kisa isan-karazany mifandiso amin'ny jerinay manokana. Mpandrary fahalemana eto an-tanindrazana, tompoko, izahay. Isan’ny antony goavana irotsahako fidiana Filohan'ny Repoblika izany.

Mankasitraka, tompokolahy.

Mankatelina, tompokovavy.

Fanambinana ho an’ny tsirairay avy.