Safidiko manokana ny hanoratra ito lahatsoratra ito
amin’ny teny malagasy satria raharahàn-tokantranontsika Malagasy. Tsy ahahaka. Efa be izay varoboba rehefa tsy voaroba izay. Hany ka isika mianakavy no sanatria mivarina ho tompony mpangataka atiny.
Mizara telo ny
lahatsoratra : Alimanaka malagasy – Azo heverina… - Rakitry ny ela.
Alimanaka
malagasy
Araka ny tetiandro, miompana amin’ny hetsi-bolana,
arabo milaro gasy ambaran’ny boky voatahirin’ny mpahalala any Atsimo Atsinanana
dia mandia ny volana Alohotsy isika izao ankehitriny izao. Io tetiandro io no manondro ny ALAHAMADY amin’ito
fem-potoana voalaza eto ambany eto ito: 20 MARSA 2015.
 |
| Source: Facebook. |
Araka ilay tetiandro hafa kosa dia Alakarabo izao
volana diavintsika izao. ALAKAOSY,
ho azy io, no mifanitsy amin’ny fem-potoanan’ny 20 MARSA 2015. Ito tetiandro
ito kosa izay miompana amin’ny fampandrindrana ny hetsi-bolana amin’ny
hetsi-masoandro dia jiosy milaro gasy no
ifotorany.
Ny mpiaradia tamin’ny dokotera Rakotonirainy mpiandraikitra fahiny
ny ivotoeran-kolontsaina malagasy tetsy Soarano no namaritra an’ito tetiandro
voalaza ito. Mbola any amin’ny tapatapaky ny volana jolay any ho any vao hipaka ny
Alahamady ho azy ito.
Amin’izay
Alahamady amin’ny jolay ho avy izay dia Alahasaty no atondron’ilay tetiandro
arabo.
Marihana fa samy
mandramby ny fotoana niampitàn’i Moshe ny Ranomasina Mena ho fiandoham-panisàna
ireo tetiandro roa ireo.
 |
| Peinture sur mur et crédit photo: Vahömbey |
Azo heverina…
Azo heverina ho fotoan-dehibe
izany ito ALAHAMADY amin’ny 20 marsa
ito. Indrindra fa ALAKAOSY no hifanandrify
aminy raha ampitahaina amin’ilay tetiandro jiosy. Mifanandratra ireo vintana
roa ireo. Tsara izany ho an-draMalagasy.
Araka ny fiheverako manokana dia midika
hatsaràna izany. Antony: mahery vaika ny Alakaosy noho izy mpampihoitra ny
Alahamady. Izay rahateo no anisan’ny antom-pisiany. Noho izany, tokony mampanjary
raharaha ankapobeny io fifandrifiam-bintana amin’ny faha-20 marsa io.
Ny ankamaroan’olona dia malaky velon-tebiteby
amin’ny Alakaosy. Saingy ahiako ho hadisoana izany satria fijery mitampina ila.
Mila fandinihana lalina io resaka Alakaosy io satria mampinompino foana ny tsy
fahampiam-pahalalàna. Koa aza miroaroa saina velively raha Alakaosy ny
vintanao, na ny an’ny zanakao, na ny an’izay mpifanapaka aina aminao.
Fahasoavana izany teraka Alakaosy izany. Tena fahasoavana tokoa.
 |
| Peinture sur mur et crédit photo: Vahömbey |
Azo heverina ho fem-potoana
makadiry ny elanelam-potoana faha-20 marsa hatramin’ny tapatapaky ny volana jolay. Mibaby
fahasoavana tokoa ho an’izay ambinin-java-manasatra.
Ny atao hoe ambinina dia
izay mahafehy tena, mandranitra maraintsihariva sady andro aman’alina ny mahaolona
azy.
Ny hoe misasatra dia ny mifanohitra amin’ny fahazaran-dratsy miandry
kitapo latsaka. Noho izany, mahavatra mamorona lalandava, miainga avy amin’ny
tsy mbola àry saingy efa masaka tanteraka an’eritreritra. Hany ka ny
fanatanterahana no ela dia io fa mivaingana ilay nonofinofisina.
 |
| Peinture sur mur et crédit photo: Vahömbey |
Azo heverina fa hihilana izay
herijika izay aorian’ny tapatapaky ny jolay satria salovanin’ny maramaran’Alahasaty
ilay fankalazana Alahamady. Saingy ny tokony tsaroana lalandava dia ity. Na
ahoana, na ahoana ny firafitrin’ny herijika mikoriana amin’ny voaàry dia
manan-tombo lalandava ra-olombelona tsy mitsaha manefy ny mahaolona azy.
Izay eritreritrao ihany, izay eritreritrao
hatrany no mihatra amin’ny fiainanao. Izay ifantohan’ny eritreritrao ihany ! Mamisavisa
ratsy ianao dia ratsy no misy eo. Manantena tsara ianao saingy mangozohozo
finoana ka ny ratsy no mibahana any ampara-hatoka dia ratsy no mitranga eo. Noho
izany, tereo ny ampara-hatoka tsy hiondana afa-tsy hatsarana. Vao miserana ny
ahiahy dia fafao. Sesefo hatsarana ny ampara-hatokao.
Mahavàra meritreritra lalandava tsy ankiato ny
tsara sy ny mahasoa ary ny mahafinaritra. Dia ny tsara sy ny mahasoa ary ny
mahafinaritra ihany no mitranga. Somary mihilana ny herijika ankapobeny ? Mety
maozamaozatra kokoa ny sedra saingy fadio ny miraviravy tànana. Miezaha ! Tsy
hoe malaindaina ampidi-drano ny saobakaka dia iny koa ianao fa hitondrevaka
hanjeny vintana hiarina. Aok’etsy ! Anao ny fanapahana. Miarena, tontosao ny
soa kinasanao.
Aleo izay sadasada saina sy marivo fo ary marefo
fanahy hibaby izay tandrify azy na ho viravirain’ny herijika mihilana aza. Ny
anao atao tsara mba ho tahafiny. Dia izay. Tapitra eo ny andraikitrao. Aleo koa
ny hafa mba hianatra hahay haka traikefa. Tsy noforonina hisolo vaika an’iza na
iza velively ianao.
 |
| Peinture sur mur et crédit photo: Vahömbey |
Azo heverina ho hafakely ito taona ito sy ny
sisa handimby eo.
"Vao tamin’ny 19 febroary 2015 tamin’ny 2 ora sy 47 minitra ary 15
sekondra lasa teo no nifanandrify tamin’ny endrika
manokana ny volana sy ny masoandro”, hoy ilay namana mpiangaly torohay tsy
andrian’ny sain’ny besinimaro. Olo-mahay sady lalim-panahy io namako io, tena hajaiko
fatratra koa aleo tsy tononiko anarana.
« A propos de la date du 19 février 2015,
j'explique pour ceux qui veulent comprendre pourquoi ce moment précis. Ce jour,
à 2:47:15 précis, la lune et le soleil seront en conjonction (ensemble,
alignés) au 0° précis du signe très puissant des Poissons, dont le degré
thébaïque est l'image d'un roi assis sur son trône. C'est très rare, de voir
pareille copulation des deux luminaires sur ce 0° des poissons. Très, très
rare. Quand les deux luminaires sont en conjonction, le pôle positif et le pôle
négatif inhérents à la structure de l'univers sont en copulation, c'est-à-dire
que, à ce moment là, l'univers met à notre disposition, pendant 20 mn (indray
maha masa bary) une énergie toute spéciale, celle avec laquelle, l'univers
lui-même, crée ses programmes. Évidemment, ce n'est qu'un point de vue. »
Dia hoy aho nanome fanampim-panazavana tany an-kafà:
“Données
astrométriques obtenues de manière empirique par transmission
intergénérationnelle du savoir consigné par écrit à l’usage exclusif des
initiés de grand ordre : conjonction
rarissime des luminaires ; amorce de reprogrammation au niveau de notre
Galaxie, celle où se situe notre système solaire. Effet prévu : énergie
spéciale durant 20 mn. »
Tena
anaty fiandohana « reprogrammation
galactique » izany isika io ankehitriny. Anjaran’ny tsirairay no
mamisavisa izay dika manokana tiany omena an’izay. Miato eo amin’ny fampahalalàna
no anjara raharahako eto.
Anatin’io lôjikan’ny “reprogrammation” io dia mahalasa saina ahy manokana eto
ampanoratana izao ny voina mahavaky fo mihatra ao Antananarivo. Azo nosorohana io, tompokolahy sy tompokovavy.
Tsy afaka ny tsy ho velom-panontaniana aho izay efa nanoratra tato amin’ito
blog ito hoe “Manivana ny tany, mikororoka ny voaàry.”
Rohy: http://www.lexpressmada.com/blog/opinions/miverina-aminny-taniny-ny-rano-25396
Inona moa no mbola azoko atao indray ? Nanoro
toa izao ataoko izao aho, zara fa nisy nihaino. Nirotsaka fidiana ho
Filohampirenena mihitsy aho nikasa hanova zava-maro tanatin’ny fotoana fohy satria
nitambesatra tamiko avokoa ny zava-pantatro tsy tsinjon’ny ankamaroan’ny olona.
Nanao izay afako aho, n’inon’inona sakana
natrehana, niavonan’ny mpifidy. Koa ataoko ahoana intsony ? Tsy ho an’ny haja
amam-boninahitro na filako vola aman-karena manokana anie no nirotsahako fa noho
izaho nasesika adidy ê. Nasesika adidy satria nahatsinjo zava-takona nialohan’ny
ankamaroan’ny olona.
Tototra alahelo aho io mizaha ireto fahoriana
mifanesisesy izay azo nosorohana raha olom-po amam-panahy no nitondra firenena.
Izao aho vao tena mahatsiaro ho resy fa tsy tamin’ireny fivoahan’ny
vokam-pifidianana ireny. Tena mandratra ahy lalina dia lalina ny manjo ny
olona. Mandraiky mandretaka ampandriana mihitsy aho saingy mikiry miarina
satria misy tokony hambara. Sitrany ahay mahasoa ny hafa. Ny anio ho vita ihany
fa ny ampitso tsy maintsy tsinjovina.
 |
| Peinture sur mur et crédit photo: Vahömbey |
Azo heverina fa indray andro
any dia hifanojo ireo tetiandro roa izay mifanila ireo ankehitriny. Hisy dia
hisy tokoa izany daty malaza izany, tompokolahy sy tompokovavy !
Amin’ny 19 marsa 2026 no iraisan’ireo Alimanaka roa ireo, arabo ara-bolana
sy jiosy ara-bolana ara-masoandro, ny fotoanan’ ALAHAMADY.
Goavana dia goavana ho an’ny Firenena
Malagasy io Alahamady iombonana io.
Raha samy mahatandrina ny tandrify
azy avy Ra-Malagasy isambatanolona, indrindra fa ireo efa vory saina
amam-panahy, dia hiranga Madagasikara manomboka eo. Afaka SIVY taona fotsiny
anie izany ê.
Koa samia velonaina, velon-driaria
mba higoka an’izany isika mianakavy. Indrindra isika rehetra efa bebe taona
izay mimatimaty mikolokolo ity firenena ity. Nandaozantsika vady aman-janaka
tamim-potoan-tsarotra, nandavantsika kolikoly vola aman-karena tokony
nampanefoefo, nihafiantsika rabirabiraby sy fanaovan-tsinotsinona izay
nitotototoantsika, …
Raha ny tenako manokana no eo
amin’ny toeram-panapahana ara-panjakana dia afantsiko amin’io daty io ny Asaramanitra ara-panjakana. Io hatrany
no ankalazaina isan-taona. Sady io rahateo afaka manamarika ny loham-pararano
fiotazam-bokatra. Isaky
ny 19 marsa: fiandohan’ny taona malagasy. Akatroka eo ny “marketing” amin’ny lafiny manontolo: culturel, social, économique, commercial, touristique, etc.
Eritreritra moa ny ahy iny. Raha
tsy anjarako ny manatanteraka izany, sao mba tontosan’ny hafa. Izaho rahateo
malaina ho be kibo koa fadiako ny mitelin-kafatra.
Tsy manakana ny tetiandro
hifandimpatra indray izany avy eo koa samy mankalaza ny azy manokana araka izay
safidiny. Fa ny an’ny fanjakana dia ny 19 Marsa. Afaka 33 taona tsy maintsy
hifanojo indray ireo Alimanaka roa karazana. Dia hahitsy indray ny datim-panjakana
amin’izay fotoana izay, mandrapahadiavana ny 33 taona manaraka. Dia toa izay
hatrany.
 |
| Peinture sur mur et crédit photo: Vahömbey |
Rakitry ny ela
Fahiny, hono, dia nanome làlana
izay vahiny nipàka teto Madagasikara hatrany ny vazimba andohan-talily hatry ny
fahagolantany. Na hatrany atsinanana ireo toa ny nambaran’ingahy Dama-Ntsoa, na
taranaka arabo niorina tao Atsimo Atsinanana, na taranak’Israely. Marihako
manokana fa tsy izay mitonona ho jiosy rehetra akory dia mpifototra
andoharanon’Israely avokoa.
Rehefa ela ny ela, tafakatra teo
antampon’Imerina ny vahiny. Teo amin’ny toerana namaharàn-dry Andriampirokana
fàka amam-pifotorana. Eo no IVON-DAFIVALON’i MADAGASIKARA. Taty aoriandriana,
teo no nandatsaham-pototra Alakaosy ny lapan’i Besakana. Ho an’ny mpiangaly dinika rohotany
dia eo no IVON’NY IVO.
Koa samia masina an-taniny satria
avoakako eto izao ny fototry ny rohotany ho anay taranam-bazimba
ankolafin’Alahamadintany tatsimo rangolahy. Hahasoa, hahatsara anie satria
ela ny ela, ny aina tsy mifametra koa sao sanatria hahadiso amin’ny taranaka
faramandimby raha indaosin’ny varintsimifody ny tena nefa tsy nafahàm-bela.
Aoka etsia ny hanao toa ilay
ingahibe nandevin-tehina fampodian’ombimanga hatrany Sakalava tamin’ny indray
teha-tehina satria tsy mba nanam-pandova hay nitokisana.
Marina ito atoroko ito. Dia marina.
Hahasoa, hahatsara izay mifantoka aminy.
Diso dia diso. Tsy hamingan-tsy
hamolaka ny hafa satria ambaben’ny tompony hatrany.
Samia tahian’Andriamanitra, hoy Ikaky Ravaho.
 |
| Elément d'archives strictement personnelles fourni par un spécialiste malagasy du SIG. Tous droits réservés. |
Tovan-dahatsoratra:
Voaray ny zoma 06 marsa 2015 avy tamin'ilay namana mpahalala izay manizingizina hoe: "Tsy mitoky teny fantatra velively." Anjaran'ny tsirairay no manadihady sy mandinika ary manapaka izay heveriny ho sahaza ny tenany.
« Position de la lune le 21 mars dans le
signe du bélier en fond la constellation des poissons. Il faut attendre le 22
mars pour trouver la lune dans la constellation du bélier, c’est pourquoi les Anakara
placent la nouvelle lune du bélier le 22 et non le 21 comme le fait le trano
kolotoraly malagasy. »
 |
| Constellation du Bélier pour le 22 mars 2015. Visuel fourni par un connaisseur. |
Aucun commentaire:
Enregistrer un commentaire